Die 2008 "Masters"

Suid Afrika het besonderse gholfspelers opgelewer. Drie van die grootste van hulle is Ernie Els, David Frost en Retief Goosen. Tydens 'n uistekende proe wat Hendrik by sy huis aangebied het, het ons as wynklub ook ontdek dat hierdie drie ook uitstekende wyne maak.

Ons het die aand begin met 'n vergelykende proe van wyne wat David Frost maak. Die wyne wat ons geproe het was:

1. Million Dollar Blend. Amper marshmalllow en speserye op die neus. Nog baie tanien, maar 'n volmond smaak met 'n lang nasmaak.
2. Shiraz 2004 - 'n Umani, Yummy, lekkerte wat opgevolg word met rook in goeie balans met vrug
3. Cabernet Sauvignon 2002 - Karoonbossie en framboos met 'n droe aanhoudende nasmaak

Daarna het die groot blinde proe aangebreek. 'n Werklike "Masters" waar die ikoon wyne van hierdie gholfspelers teen een van Suid Afrika se beste rooi wyne opgeweeg is. Almal het die wyne blind geproe en toe gesamentlik gestem vir die beste wyn van die aand. Die resultate was as volg:

Eerste: Retief Goosen se 2006 Goose - 'n Elegante wyn met baie kompleksiteit
Tweede: David Frost se Par Excellence 2003 - Ernstige wyn
Derde: Ernie Els 2003
Vierde: Anwilka 2005
Alhoewel ons die wyne moes rate, was almal van uitstekende gehalte en sou almal werklike 18-19 tellings by ons gekry het.

Daarna het ons net lekker uitgespan, wyn gedrink en gesels

Besoek aan Saronsberg

Die jaar 2008 word by Saronsberg (kampioen wynmakers) afgeskop. Die klub maak geskiedenis om kinders van lede wat groot genoeg is ook na die proe uit te nooi en die eksperiment blyk 'n groot sukses te wees. Van die kinders wat vandag teenwoordig was, was maar sewe toe die klub gestig is.

Die klub is bevoorreg om deur Dewaldt Heyns ontvang te word. Ons word deur 'n kelder toer geneem en in die woorde van Nico: "Wat my veral beïndruk het was hoe knap en kundig Dewaldt Heyns as wynmaker was - sonder foefies en pretensies. Die pragtige kelder, sy kunswerke, die puik wyne en verruklike middagete het verder die kroon gespan om die dag."

Ons proe die volgende wyne:

1. Provenance MCC Brut - Beskuitjie en sitrus wat eindig met 'n vars nasmaak
2. Provenance Sauvignon Blanc 2007 - Nuwe wereld styl vol vrugte en groen rissie
3. Saronsberg Chardonnay 2005 - Elegante wyn, vars met die lemmetjie en hout-geure in baie goeie balans.
4. Saronsberg Shiraz 2005 - 'n Uitstekende voorbeeld van die varieteit. Die vrug is veral prominent, maar in perfekte balans met die tanien.
5. Saronsberg FullCircle 2005 - Die klub se gunsteling. Baie komplekse wyn met 'n aantreklike karakter en verouderingspotensiaal
6. Saronsberg Seismic 2005 - 'n Baie elegante wyn, delikaat met 'n CS karakter.

Jaarafsluiting 2007

Die aktiwiteite word met 'n hoogtepunt afgesluit met 'n uitstekende aand-ete by die Oude Paarl Hotel. Die geleentheid is uitstekend gereel deur Abrie en Susan. Die drie-gang maal is gekomplimenteer deur wyne van Nederberg en teen die einde van die aand is die prys-wenner Manor House Shiraz ook geproe.

Die "food and wine pairing" was as volg:

Voorgereg: Eend en beet gereg met Nederberg Chardonnay
Hoofgereg: Bees fillet met Kapokaartappels, met 'n Nederberg Shiraz
Nagereg: Creme Brulee met Nederberg Late Harvest.

Lourensford

Die wynklub besoek die impossante Lourensford wynplaas net buite Somerset-Wes. 'n Uitstekende proe word aangebied waar wyn en Nougat vergelyk word. Al die wyne spreek van uitstaande gehalte:

1. Viognier - Appeliefie, appelkoos met ligte vanilje geure.
2. Seventeen Hundred - (Merlot, Cab en Shiraz) met diep leer geure
3. Noble Late Harvest - 'n wenner: appelkoos en heuning

Haskell Vineyards

Woensdag aan die boutiek kelder Haskell Vineyards besoek. Dit was weereens 'n uitstekende proe aangebied deur die hoof-wynmaker (Rianie Strydom). Sy is hier tweede van regs onder in die proe-kamer saam met Sam, Marlene en Isobel.

Ons is be-indruk deur die beklemtoning van kwaliteit en die visie wat Rianie vir die kelder het. Deur die loop van die aand is ons veral getref deur die slim gebruik van hout in hierdie kelder. Van die wyne wat ons geproe het is:
1. Chardonnay 2006 - Komplekse vrugte (appels, lemmetjie), afgerond met 'n volrond vars smaak.
2. Chardonnay 2005 - Die vrugte is goed gebalanseerd met die hout wat meer na vore tree in hierdie goed ge-integreerde wyn
3. Shiraz (2006 - nog ongebotteld) - Ons het die impak van verskillende kuipers op hierdie wyn geproe.
4. Cabernet Sauvignon (2007 - ongebotteld) - Weereens die invloed van verskillende kuipers gesien op 'n wyn met baie potensiaal
5. Boulder Road Shiraz 2005 - Die aardse speserye aangevul met hout geure gaan oor in 'n volrond smaak met 'n lang nasmaak.
6. Samara 2005 - Alhoewel aanvanklik skaam op die neus is alles goed gebalanseert met komplekse struktuur op die mond.
7. Amalgam 2004 - Die bessies en sjokolade beloftes op die neus word bevestig in die mond waar die taniene goeie ondersteuning gee vir die "smooth" smaak.

Nuwe Konstitusie

Die huidige bestuur het ons konstitusie deeglik hersien. (Dit was nodig gewees om dit te doen aangesien ons reeds amper vyftien jaar saam proe en dinge het effens verander). Ons het goed besin oor belangrike aspekte van ons proe en besluite geneem oor lidmaatskap en lede-gelde. Van die praktyke wat ons deur die jare gevestig het (en wat nie in die ou dae gegeld het nie - soos e-posse ens.) is nou in ons konstitusie verskans.

Een van die belangrikste elemente wat behoue gebly het is dat ons besluit het om 'n wyngilde te bly en nie die naam na 'n "klub" te verander nie - of soos Hendrik dit gestel het - "ons vlieg nie duiwe nie."

Die lekker van die "konstitusie-vergadering" was dat ons weer bymekaar kon kom. (Abrie het Lucas Thachers se kantore beskikbaar gestel) en elkeen het 'n goeie bottel rooi-wyn en vinger-ete-dinge saamgebring. Ons het die aand afgesluit met onder andere 'n Ernie Els, 'n Barolo en 'n wyn van Chile. Was "great" gewees.